三騎師連環落樓!羅理雅骨折要送院!-NEW-ONE熱點

三騎師連環落樓!羅理雅骨折要送院!

作者:Claudia    發表日期:2017-06-03 23:24:04

今日沙田馬場第四場四班田草千二賽事,又發生連環落樓意外,轉完直路彎之後,騎師羅理雅坐騎「飛鶯」先是走勢不規,未幾就失平衡並拋下鞍上人,而後邊兩匹「好醒」及「魅力之子」收掣不及雙雙撞倒,「好醒」騎者何澤堯及「魅力之子」鞍上人田泰安都被拋下,同場一連三位騎師落樓,鏡頭所見真係相當驚險!

之後三位騎師初步檢查都見清醒,但羅理雅就由救護車送咗去醫院,馬會update羅理雅消息,話依家驗到佢右膊頭移位,同埋右腳足踝有裂痕,需要留院觀察;另外何澤堯就冇乜大礙,但頭部有啲瘀傷,所以今日唔跑得,而田泰安可以繼續騎。

羅理雅不幸落樓更要送院,在場的羅理雅太太同囝囝金寶當然憂心,羅太更跟上救護車去醫院,至於拋下羅理雅嘅「飛鶯」,就因斷腳而要當場人道毀滅。

去到第五場賽事,出閘又見有意外發生,本地見習騎師巫顯東,策何良馬房「明目張膽」起步冇耐就跌落嚟,「明目張膽」就冇騎師策騎下單獨喺前面走,好彩騎師巫顯東冇事,可自行離開賽道去過磅。


本文來源:http://hk.on.cc/hk/bkn/cnt/sport/20170417/bkn-20170417144311449-0417_00882_001.html




Tag:
本文链接:http://www.dvbmanufacturer.com/12756.html