利市直擊 親訪米活 「最佳球員」文尼亂入-NEW-ONE熱點

利市直擊 親訪米活 「最佳球員」文尼亂入

作者:Gladys    發表日期:2017-06-01 19:59:02

今次小記去利物浦採訪「渣打5人挑戰盃」,唔止因為咁而入到晏菲路球場欣賞英超煞科戰,仲實現咗另一個難能可貴嘅夢想--去到米活訓練場參觀,更加驚喜嘅係,居然見到正養緊傷嘅沙迪奧文尼,直接由正門行入呢個基地,令呢位獲多位名宿揀做今季最佳球員嘅塞內加爾球星,成為「集郵」對象。

一行人難得可以入到去利物浦一隊專用嘅米活訓練場,本身已經非常高興,突然大家嘅目光都移向訓練場大閘,原來係因傷長抖嘅沙迪奧文尼現身,幾十人即時狂奔將文尼包圍,雖然面對一班狂熱粉絲,但文尼依然保持笑容,逐個Selfie,一啲架子都無;同時間另一傷兵佐敦軒達臣亦揸車駛入訓練場,但「軒隊」趁住其他人嘅注意力喺文尼身上時,「快閃」駛入基地內。「渣打5人挑戰盃」總決賽前,3位名宿包括史米沙、貝加同魯殊現身記招,佢哋一致認為文尼雖然受傷,但仍然係全季表現最佳;伊雲斯就話自己着重團隊多於個人,唔認為要揀選最佳球員,但亦認同文尼嘅能力。

米活訓練場內禁止影相,唯有「純文字討論」,呢個基地麻雀雖小,五臟俱全,兩個球場、按摩浴池、健身室、物理治療室、記招室等一應俱全,但始終歷史比較悠久,難怪球會已經決定擴建原有嘅足球學院做新訓練中心,意味住米活會喺2019年新場啟用時,正式關閉,令今次參觀機會更可貴。


本文來源:http://hk.on.cc/hk/bkn/cnt/sport/20170522/bkn-20170522115315682-0522_00882_001.html




Tag:
本文链接:http://www.dvbmanufacturer.com/9668.html