西甲 係你喇!華爾維迪係巴塞新揸弗人-NEW-ONE熱點

西甲 係你喇!華爾維迪係巴塞新揸弗人

作者:SHARON    發表日期:2018-09-29 07:43:03

巴塞隆拿主帥安歷基日前帶隊贏埋西班牙盃之後,就正式結束佢3年巴塞主帥生涯,至於邊個接替佢?「地上最強」今晨就有公佈,原來就係畢爾包領隊華爾維迪!咩話?你哋唔多識佢?查實華帥都係前巴塞人,球員時代跟過告魯夫搵食,做領隊又幫過奧林比亞高斯贏過3次希臘聯賽冠軍,巴塞會長巴度美奧讚佢經驗好,又夠冷靜喎!係咪咁堅?下季大家咪知囉!

查實安歷基日前受訪就畀咗多少貼士球迷,安帥話佢嘅接任人經驗仲豐富過佢喎!究竟華爾維迪係咪真係堅料?呢位53歲主帥上星期先同畢爾包辭職,2015年佢就試過喺西超盃領軍炒起巴塞4蛋,為安歷基帶來佢喺巴塞領軍以來最大敗仗。華爾維迪出名係佢能夠將球隊潛力發揮到最好,之前無論佢帶領畢爾包、愛斯賓奴、維拉利爾同華倫西亞,都有不俗評價。至於最緊要,係佢仲流有巴塞血,原來佢喺1988至90兩季之中,喺告魯夫麾下贏過歐洲盃賽冠軍盃同西班牙盃,點計都係自己友啦!

華爾維迪今次同巴塞簽咗一紙兩年約,同時佢仲有權選擇續唔續約教第3年。教練生涯領軍出戰超過500場嘅佢,會喺西班牙時間周二正式以巴塞新帥身份同球迷及記者會面,而佢上任後首個大考驗,就係下季嘅西超盃,事關巴塞到時會以西班牙盃盟主身份,同西甲冠軍皇馬火併,到時就知佢係咪堅有料喇!

東網體育同你追實體壇每個精彩時刻! 
http://bit.ly/2ecTF2A 


本文來源:http://hk.on.cc/hk/bkn/cnt/sport/20170530/bkn-20170530025258230-0530_00882_001.html




Tag:
本文連結:http://www.dvbmanufacturer.com/9862.html